IKE yayiwubusa indlu emhlophe umjaho wejubane webanga elide kuleli, owaziwa ngele Comrades Marathon, lapho umsubathi omhlophe u Bruce Fordayce ebezenzela nje, ewunqoba izikhathi eziyisi 9 lomdlalo.
Indlu emnyama ize yaqala ukuyinqoba ngowe 1989 i Comrades Marathon, inqotshwa ngu Sam Tshabalala, wasesifundazweni sase Mpumalanga. Bekujabule ngisho ikati ngalowo nyaka ngoba bekuqala ngqa emlandweni wakuleli, ukuba lomjaho unqotshwe ngumsubathi womdabu. Ukunqoba i Comrades Marathon uTshabalala kumkhiphe emkhukhwini nomndeni wakhe, kwayomfaka endlini enhle.
U Tshabalala lomjaho uwunqobe esawugijime nje kathathu. Uwuqale ngowe 1987. Ngowe 1988 kwaba ngokwesibili. Ngowe 1989, wawuqopha umlando ewunqoba eThekwini. Ngaphambi kwakhe bekubusa o Fodyce nabo Nick Bester. Uwunqobe kubanjwe umoya abaKwaZulu-Natal bebheke umgijimi wabo u Willy Mtolo, obemhleli ezithendeni uTshabalala. Nguye uMtolo ophume isibili kowe 1987 elandela uTshabalala.
Elakwa Mthaniya lize lezwa umuzwa wokunqoba i Comrades Marathon ngowezi 2014, ngokunqoba kuka Bongumusa Mthembu (osesithombeni), ozalwa eMpendle, e Bulwer. U Mthembu uqale ukugijima amabanga amade ngowezi 2004. Kwathi ngonyaka wezi 2014 wenza ezibukwayo edlula umRashiya ezintabeni zodumo kulomjaho ezisekungeneni eMgungundlovu, ezaziwa ngelama Polly Shots, okuthiwa yizo ezishikilisa abagijimi uma umjaho uya eMgungundlovu.
U Jama kaMnisi uvele wayifundisa isifundo lensizwa yase Russia kuma Polly Shots, wayedlula sengathi imile. U Mthembu usewunqobe izikhathi ezintathu lomjaho. Ngowezi 2014, 2017, nezi 2018.
Akwaziwa mbhantshi kujiya kusasa. Akwaziwa ukuthi iyonqotshwa ngubani le Comrades Marathon ezobe isigijinywa okuka 97 selokhu yasungulwa.
