SELISEMATHENI eNingizimu Afrika yonke igama leNjampela kwaNongoma, okwakuyigama lomunye wemizi yabantwana baseNdlunkulu, okuthiwa waqanjwa nguMntwana uMaphitha, uyise kaMntwana uZibhebhu, odume ngelika Zibhebhu kaMaphitha. Okungenzeka ukuthi kwakungumuzi wakhe uMntwana uMaphitha.
Iqembu lebhola lakhona eNjampela, nalo elibizwa ngeNjampela FC, lenze ezibukwayo liba ngompetha base KZN kwi ABC Motsepe Legue. Lizobamba indiza ngelizayo liphikelele e Uppington, esifundazweni i Northern Cape, seliyomela elaKwaMthaniya libhekene namanye amaqembu ayisi 8, nawo amele izifundazwe zawo. Lamaqembu azokube eseshudulisana elwa nokuthola indawo yokuqala neyesibili ukuze akhushulelwe esigabeni se First Division esesibizwa nge Motsepe Foundation Championship kusukela ziyi 17 ku June, kophezulu. Lesi sigaba sike sabizwa nge Zambuk League, Mvhela League, njengoba manje sekuyi Motsepe Foundation Championship.
ENjampela ngokuchazelwa kwe Xolani Weekly Journal ngesinye sezikhulu zikaHulumeni KwaNongoma, uma uya eNjampela uthatha umgwaqo oya eMaphophoma, udlule esontweni lamaSheshi i St Margaret’s, bese uthi ungakafiki eMaphophoma, uchezukele ngakwesokunxele, bese uqonda kulendawo engaphansi kwaKwaMandlakazi ngaphansi kweNkosi uMntwana uBhekintinta Zulu. Ukhangwa nje yindlu kanokusho eyisitezi yesikhulu saleliqembu. Nabadlali bahlala ntofontofo kuyo. Isikhulu saleli qembu ngu Mnu Sibusiso Buthelezi.
Njengoba kwaziwa ukuthi isizinda semidlalo sisezikoleni, leliqembu abanye abadlali balo libaphakelwa yi Zwide High School, KwaNzima Primary School, ne Manzezulu Primary School. Uma bezinikele laba bafana baKwaZulu bayodlula. Osondelangange nje abaphambi kwabo, yiqembu elimele i Gauteng, iDondol Stars, ne Mangaung United, emele i Free State. Abadala bazokhumbula ukuthi eminyakeni yama 70s iMangaung United yayidlala ku National Professional Soccer League (NPSL). Kuyiyo ne Bloemfontein Celtic amaqembu ase Orange Free State, isabizwa kanjalo i Free State.
