IZIMBOBO zomuhlwa zithi okubambezela ukumenyezelwa koNgqongqoshe abasha bakaHulumeni woBumbano, okuyi Government of National Unity (GNU), yinhliziyo engaphandle ye Democratic Alliance (DA), okuthiwa ifuna oNgqongqoshe abaningi, nokuthi bathole leMinyango enonile kuHulumeni.
Lapha kubalwa uMnyango osingethe onke amadamu akuleli nemimfula namanzi angaphansi, okunguMnyango waManzi nokuSingathwa kweNdle, owezokuXhumana, owezeziMbiwa Phansi, owezeMfundo, owokoPhathwa kwemiNyango neziSebenzi zikaHulumeni, njalo njalo. Izimbobo zomuhlwa zithi njengoba eseyishumi amaqembu abumbe loHulumeni woBambiswano, uMongameli Cyril Ramaphosa akakwazi ukuthi anganikeza iminyango eminingi iqembu elilodwa, futhi elifuna amanoni, kanti nabeqembu lakhe uMongameli, okuyi African National Congress (ANC), libheke wona amanoni.
Okunye ezomuhlwa ezithi kufunwa yi DA, wukuba kuqokwe uMongameli wayo uMnu John Steenhuizen ukuba nguSekela-Mongameli wezwe, ekhona uMnu Paul Mashatile obenguMongameli wezwe futhi ovela ku ANC. Kuzwakala nokuthi i ANC isiyibekele umnqamulajuqu wehora lesihlanu namhlanje ngeSonto, ukuba yemukele ekunikwayo i DA, ngaphambi kokuba uMongameli amemezele ikhabhinethi lakhe elisha.
Amanye amaqembu ayingxenye ye GNU, yi Inkatha Freedom Party (IFP), Patriotic Front (PA), Pan Africanist Congress (PAC), Good Party, Freedom Front Plus (FF+), Al Jama, United Democratic Movement (UDM, ne Rise Mzansi yoqweqwe lwentatheli uMnu Songezo Zibi.
