UMA kuhlangene ama high schools namakolishi e Adam’s College, eManzimtoti, eminyakeni yama 70s nama 80s, kuzodlalwa imidlalo yama athletics, izilomo kulemidlalo bekuba ngo Makhongco Bam wase Adam’s College, no Joel ‘The Horse’ Faya we Mzuvele High School yaKwaMashu.
UMakhongco Bam, engicabanga ukuthi ubefundela ubuthisha e Adam’s College, ubegijima kuma hurdles, abeweqa sengathi ugijima ngogesi. egijima ebangeni lamamitha ayikhulu, nangamakhulu amabili. Kwezokugijima ebangeni lamakhulu amabili nelamakhulu amane, nelokunikezelana induku (relay), bekubukwa lesi silomo saKwaMashu, eMzuvele High School, u Joel Faya.
Ngaleso sikhathi uFaya ubebuye abe yisilomo ebholeni, edlala ibhola elinenkosi phakathi. Ubedlalela iqembu lebhola laKwaMashu, i Island. Abaningi bamaze esegqamile, esedlalela amaZulu FC, uSuthu. Lapha ubesengumshayi magoli osezingeni eliphezulu, eseyithemba labalandeli boSuthu. Nesikole sakhe uMzuvele High besidla ngayo emidlalweni yendebe ye Cocacola. IMzuvele High yisikole esithathwa njengenkulisa yabadlali bebhola elikhokhelwayo njengoba abadlali abaningi abadumile befunde khona. Singabala nje o Siyabonga Bhele Nomvethe, oNane Nqetho, nabanye.
Abanye abadlali adlale nabo kakhulu uFaya, odlule emhlabeni, esengumqeqeshi wezikwata ezincane zoSuthu, ngo Mafa Nduli, Tsepo Tsoane, Julius Chirwa, Joe Mlaba, Sugar Ray Xulu, Sipho Zimba, Shadrack Biemba, Nhlanhla nomfowabo uMjabu Ncube, Majuba Magwaza, Bonga Shusha, Lucky Molife, Themba Thwala, Bhunu Hlengwa, Moffat Zuma, nabanye. Usazozalwa umdlali oyokwazi ukugoba ibhola ophondweni lwesokudla njengo Faya oSuthwini.
