UKUVUKA indlobane kwabantu base Kenya, bethi lingawa licoshwe zinkukhu kunokuthi bakhokhiswe intela eyenyusiwe ezinkweni nakumafutha okuthosa, kusenze sagcina sehlele ngezansi isifundiswa esinguMongameli wakuleli yazwe eliseMpumalanga ye Africa, i Kenya.
U Dkt William Ruto (osesithombeni), ugcine esememezele ukuthi akasezukuwusayina umthethosivivinywa abezogunyaza ngawo ukuba kwenyuswe intela yesinkwa noteli kwelase Kenya. Abantu bakhona banele bangezwa elokwenyuka kwentela, balingisa inkosi uBhambatha kaMancinza wakwa Zondi eNgome, owashaya phansi ngonyawo uma amaNgisiethi indoda isizothelela ikhanda layo. Bavele bagcwala izitaladi zekomkhulu lakuleliyazwe, i Nairobi, besho ukungena ngoshova endlini ka Dkt Ruto.
Amaphoyisa akhona aqale akhipha isisa esikhalisa izinyembezi, kwasho ukuthi abantu abasawubambi umshini, ase edubula kwafa abantu abalinganiselwa eshumini nane. Ezikhalela uMongameli Ruto, uthi izwe lakhe licwile esikweletini esibi esingama $80 billion. Ubethi uzama inhlanhla, kanti akabuzanga elangeni. LoMongameli uthathe izintambo zombuso ngowezi 2022, ku Mnu Uhuru Kenyatta. Isiphakamiso besithi intela izokwenyuka ngo 16% esinkweni, kumafutha okuthosa yenyuke ngo 25%, phakathi kokunye.
Kukhona abahlaziyi esebemsola uMnu Kenyatta beno Mnu Raila Odinga, oke waba nguNdunankulu, ukuthi bangase babe nesandla kulemibhikisho. Bebesola izinkulumo zabo ezizwakale zingakubabhikishi.
